میونخ کے ہوائی اڈے پر خطرہ ٹل گیا، پروازیں بحال.

پولیس نے جرمن شہر میونخ کے ہوائی اڈے کو دوبارہ سے کھول دیا ہے۔ آج منگل کو ایک مسافر حفاظتی انتظامات مکمل کرائے بغیر ہی عمارت میں داخل ہو گیا تھا۔

خبر رساں اداروں کے مطابق مکمل چیکنگ کے بغیر مسافر کے عمارت میں داخل ہونے کے بعد میونخ کے ہوائی اڈے کے ٹرمینل ٹو پر تمام مسافروں سے ایک مرتبہ پھر  سکینرز سے گزرنے کی درخواست کی گئی۔ بتایا گیا ہے کہ اس صورتحال میں ٹرمینل ایک کے بھی کچھ حصے کو بند کر دیا گیا تھا۔

پولیس کی طرف سے جاری ہونے والے بیان میں کہا گیا ہے کہ شبہ ہے کہ متعلقہ مسافر ہنگامی صورتحال میں استعمال کیے جانے والے دروازے کے ذریعے ہوائی اڈے کے حفاظتی علاقے میں داخل ہوا۔ حکام نےیہ نہیں بتایا کہ اس دوران کتنی  پروازیں منسوخ ہوئیں یا انہیں تاخیر کا سامنا کرنا پڑا۔ اس موقع پر ہوائی اڈے کی انتظامیہ نے مسافروں سے اپنی اپنی فضائی کمپنی سے رابطہ کرنے کو کہا۔

میونخ ایئرپورٹ جرمنی کا دوسرا مصروف ترین ہوائی اڈہ ہے۔ اس ہوائی اڈے پر اسی طرح کا ایک واقعہ 2018ء کے موسم گرما کی چھٹیوں میں بھی پیش آیا تھا۔ اس موقع پر تین سو تیس پروازیں منسوخ کرنا پڑیں تھیں۔

جواب دیں

This site is protected by wp-copyrightpro.com